Янгиликлар

Qashqadaryolik blogerlar faoliyatini tugatyapti

5 iyun kuni Qashqadaryoning Nasafnews.uz nashri faoliyatini to'xtatganini ma'lum qildi. Nashr rahbari va "Kapitan Karimov" blogi muallifi Umid Karimov ham bundan keyin blog yuritmasligini aytdi. Shundan so'ng Qashqadaryo viloyatida faoliyat yurituvchi blogerlar Otabek Ortiqov va AvtoblogUz muallifi Maqsud Muzaffarovlar ham ishlarini to'xtatgani to'g'risida xabar berdi.
Yaqinda shu blogerlardan ikki nafari IIB xodimlari bilan nizodan keyin hibsga olingan edi.


Bir necha kun avval ikki nafar bloger Shahrisabz shahrida "mayda bezorilik", "ichki ishlar organlari xodimlarining qonuniy talablarini bajarmaslik" va boshqa bir necha huquqbuzarlik tufayli 5 sutka qamoq jazosiga mahkum qilingan edi. Shunday bo'lishiga shahar ichki ishlar bo'limi rahbariyati bilan nizo sabab bo'ldi. Holat bir necha savollarni tug'dirdi. Huquqshunoslar va sobiq deputat blogerlarning hibsga olinishi so'z erkinligiga bosim ekaniga ishora qilishdi.
"Faoliyatimning to'xtashiga so'nggi voqealarning ham aloqasi bor. Meni bir fakt hayratga soldi. Sud zaliga kirganimdan so'ng men sudyadan bir necha bor bodikameradagi (IIB xodimining) yozuvni ko'rib chiqishni iltimos qildim. Lekin u buni inobatga olmadi. Sudda xodimni urmaganim va haqorat qilmaganimni aytdim. Sud zalida televizor bor, bodikameradagi yozuvni qo'yishlarini iltimos qildim, lekin ular buni inobatga olishmadi", - dedi Umid Karimov "Gazeta.uz" muhbiriga.
"Advokat so'raganimda ham javob bo'lmadi. Tanish huquqshunosga qo'ng'iroq qilishlarini va Zoom orqali ishtrokini ta'minlashlarini so'radim. Afsuski, bitta ham iltimosim qoniqtirilmadi. Shunchaki besh sutka berishdi va qo'yib yuborishdi. Shuning uchun ham ishimni to'xtataman", - dedi bloger.
"Qonun bizni himoya qiladi, deb o'ylagandik", - yakunladi Umid Karimov. Kelgusi rejalari to'g'risida so'rashganda, bu haqda o'ylab ko'rmaganini aytdi.
Avtobloger Maqsud Muzaffarov "himoya yo'qligi" uchun faoliyatini tugatganini aytdi.
Haqiqat yo'qligiga o'zim guvoh bo'ldim. Faoliyatimni davom ettirishim uchun himoya yo'qligini ko'rdim. Sodir bo'lgan voqea ko'zlarimni ochdi", - dedi u.
"Oliy sudgacha borish niyatim bor. Sudda bodikamera yozuvlarini ko'rsatishmadi. Agar ko'rsatganlarida biz aybdor emasligimiz, hech kimni ayblamaganimiz va boshqa punktlarga oydinlik kiritilardi. Bizni advokat bilan ta'minlashmadi. Tuhmatni isbotlashga O'zi yordam bersin", - ta'kidladi Maqsud Muzaffarov.
Otabek Ortiqov ham ishni to'xtatish qarori sodir bo'lgan voqealar natijasi ekanini aytdi.
"Yoshlikda ko'p sho'xlik qilganman. 10-15 sutka men uchun yangilik emas. Lekin o'sha voqealar ta'sirida onam yuraklarini oldirib qo'yganlar, sog'liklari yomonlashgan - ikki marta insult bo'ldilar. Bunday "o'tqizishlar" ko'paygan paytda onamni sog'liklarini xavf ostiga qo'ya olmayman. Maqsud Muzaffarov misolida guvohi bo'ldingiz, sud uni eshitmadi, besh sutka berdi. Ertaga men ham bu holatga tushmasligimga hech kim kafolat bera olmaydi", - dedi bloger.
"Bunday holat sodir bo'lib, onam buni ko'tara olmasalar, onamni joniga zomin bo'lolmayman. Bundan keyin oddiy odamlar qatori yashamoqchiman. Hozircha dam olib, erkin va beg'am hayot kechirishni istayman. Kelgusi ish haqida o'ylab ko'rmadim", dedi Otabek Ortiqov.
5 iyun kuni Qashqadaryo viloyatida faoliyat olib boruvchi Keshnews va Yazturdiyev Telegram-kanallari ham faoliyatini to'xtatganini ma'lum qildi.
Manba: Gazeta.uz
2023-06-06 14:05